8 сакавіка бягучага года былы 40-гадовы кіроўца іранскага пасольства прывёз у Беларусь з Ірана 144 г опію і больш за 3.000 таблетак трамадола вагой 1,69 кг.
Наркотыкі 40-гадовы мужчына схаваў у сумцы і шкарпэтках, бесперашкодна прайшоў памежны і мытны кантроль, прыбыў рэйсам з Тэгерана ў Нацыянальны аэрапорт Мінск. Як паведаміў намеснік пракурора Кастрычніцкага раёна Донат Дабравольскі, пракуратура накіравала матэрыялы справы ў раённы суд сталіцы. Іншаземец абвінавачваецца ў кантрабандзе і незаконным абароце наркатычных сродкаў, псіхатропных рэчываў, аналагаў і прэкурсораў (ч. 2 арт. 228 КК і ч. 3 арт. 328 КК).
Схаваўшы таблеткі ў сумку, а опій — у шкарпэткі, пасля аэрапорта мужчына адправіўся дадому. Там яго затрымалі супрацоўнікі міліцыі. Іншаземец настойвае на тым, што наркотыкі прывёз выключна для ўласнага спажывання, піша БелаПАН.