З 1 чэрвеня пляжы Гомеля афіцыйна абвешчаныя адкрытымі. Напярэдадні гэтай актуальнай для гарачага лета даты ў Гарвыканкаме адбылася сустрэча журналістаў са спецыялістамі, якія непасрэдна адказваюць за арганізацыю культурнага, якаснага і, што надзвычай істотна, бяспечнага адпачынку на вадзе. Ужо цяпер прыведзены ў парадак аб’екты інфраструктуры, ёсць дамоўленасці і па гандлёвых кропках, якіх раней месцамі не хапала. Зноў замоўленыя і ўстаноўлены рознага роду папярэджвальныя знакі аб забароне распальвання вогнішча, мыцця машын і купання ў забароненых месцах.
Зрэшты, адны грамадзяне ўказанняў прытрымліваюцца, іншыя ж знакі папросту ламаюць. Адсюль лішнія выдаткі і свайго роду паказчык узроўню культуры часткі насельніцтва.
Дарэчы, і да сённяшняга дня наведваць афіцыйна дазволеныя пляжы ніхто не забараняў. Усе неабходныя нормы па якасці вады выкананыя, надвор’е спрыяла. Вось толькі акрамя вадаёмаў, дзе традыцыйна дзяжураць ратавальнікі і створаны ўсе неабходныя ўмовы для адпачывальнікаў, існуе і пералік месцаў, якія ўпрыгожваюць шыльды «Купанне забаронена». Гэта не замінае людзям рэгулярна ігнараваць забарону на свой страх і рызыку. Да прыкладу – ў частцы возера Любенскага, адразу за канчатковым прыпынкам аўтобусаў. За чысціню вады ў месцы несанкцыянаванага купання наўрад ці хтось зможа паручыцца, а вось рэйды па забароненых пляжах плануюцца.
Не ўсе ведаюць, што апроч крымінальнага існуе яшчэ і водны кодэкс, асноўныя артыкулы з якога варта падвучыць перад тым, як адправіцца на пляж. За купанне ў неналежным месцы, як і, да прыкладу, за аўтамабіль, які стаіць у межах 30 метраў ад вады, можна атрымаць не толькі папярэджанне, але і штраф. Спецыялісты сцвярджаюць – не варта ленавацца прайсці лішніх сотню-другую метраў да зон адпачынку, якія не ўяўляюць небяспекі. Ад гэтага якасць летніх водных працэдур толькі ўзрасце.
Паводле gomelradio
