«Арт-Сядзіба» да 23 лютага падрыхтавала падарункавыя цукеркі.
«Напраўду гэта цукеркі «Алёнка». Мы зрабілі дызайн абгорткі і ўручную перапакавалі цукеркі», – распавёў «Радыё Свабода» дырэктар «Арт Сядзібы» Павел Белавус.
З ягоных слоў, такім чынам супрацоўнікі «Арт-Сядзібы» захацелі павіншаваць сваіх наведвальнікаў з 23 лютым.
«Сённяшні дзень для кагосьці свята, для кагосьці – не. Для кагосьці гэтае свята тычыцца толькі тых, хто служыў у войску. Для іншых – гэта дзень «Беларускай краёвай абароны» (БКА). Мы наважылі ўзяць цукеркі «Камунаркі» і зрабіць для іх альтэрнатыўную абгортку. Напраўду гэта «Алёнка». Да 8 сакавіка мы зробім такія ж цукеркі, але з выявай вершніцы – гэта будуць цукеркі, якімі мы павіншуем дзяўчат. А на Дзень Волі 25 сакавіка будзем частаваць і тымі, і тымі ўдзельнікаў шэсця».
Павел Белавус сказаў, што рэакцыя ў інтэрнэце на з’яўленне цукерак з «Пагоняй» магла б натхніць фабрыку «Камунарка» на выпуск цукерак калі не з аналагічнай абгорткай, то хаця б з нацыянальнымі ўзорамі:
«Я ўпэўнены, што такія цукеркі з беларускімі сімваламі і ўзорамі будуць карыстацца попытам – і як сувенір, і як пачастунак. Ужо цяпер у нас пытаюцца, што рабіць з абгорткай – выкідаць неяк не хочацца. На гэта я кажу, што выкідваць не трэба, можна проста захаваць ці зрабіць закладку для кнігі».
