Медна-нікелевая памятная манета Нацыянальнага банка Беларусі “БПС-Сбербанк. 90 гадоў” заняла першае месца на міжнародным конкурсуе “Манета года” (Coin of the Year, COTY) у намінацыі “Найбольш значная сучасная падзея”. У конкурсе ўдзельнічалі манеты, выпушчаныя ў абарачэнне ў 2013 годзе, паведамляе прэс-служба Нацбанка.
Распрацоўка эскізнага праекта манеты-пераможцы выконвалася мастаком Нацыянальнага банка Святланай Някрасавай. На манеце выяўлена дрэва жыцця, у галінах якога размешчаны знак ААТ “БПС-Ашчадбанк”. У аснове кампазіцыі ляжыць ідэя, што “БПС-Ашчадбанк”, падобна жывому дрэву, пастаянна знаходзіцца ў працэсе росту і развіцця і да свайго юбілею падыходзіць квітнеючым і поўным сімвалаў дастатку і шчасця. На аверсе манеты — нацыянальны арнамент, які сімвалізуе багацце і поспех у гаспадарчай дзейнасці чалавека, пiша “БелаПАН”
На конкурс “Манета года” было прадстаўлена каля ста манет розных краін. Лепшыя вызначаліся 80 членамі журы ў 10 намінацыях. На агульным конкурсе бясспрэчным лідарам прызнана залатая манета серыі “Клімт і яго жанчыны”, наміналам 50 еўра, адчаканеная ў Аўстрыйскім манетным дворы. Цырымонія ўзнагароджання пераможцаў прайшла падчас 44-га Сусветнага кірмашу грошай у Берліне 31 студзеня 2015 года.
Заснаваны больш за 20 гадоў таму конкурс быў арганізаваны для ўдасканалення дызайну, спосабаў збыту, павышэння эстэтычнай каштоўнасці і якасці чаканкі сучасных манет.
Нацыянальны банк Беларусі ўдзельнічае ў гэтым прэстыжным міжнародным конкурсе з 2005 года і яго манеты ўжо некалькі разоў перамагалі ў розных намінацыях
