Беларускае піва з’яўляецца больш якасным і натуральным у параўнанні з імпартным. Такое меркаванне выказаў Прэзідэнт Беларусі Аляксандр Лукашэнка сёння на нарадзе аб стане і перспектывах развіцця піваварнай галіны Беларусі, перадае карэспандэнт БЕЛТА.
«Я хацеў бы пачуць ад вас, чыё піва мы сёння п’ём. Вы п’яце — не я, — сказаў кіраўнік дзяржавы, звяртаючыся да ўдзельнікаў нарады. — Мяне гэта насцярожвае: вы што, імпартнае піва лічыце лепш за нашае і думаеце далей атручваць беларускі народ?».
Як адзначыў Аляксандр Лукашэнка, па заявах дасведчаных спецыялістаў і людзей, якія ўжываюць піва, імпартная прадукцыя нашпігаваная рознага роду смакавымі дадаткамі і кансервантамі. «Беларускае піва — натуральнае», — упэўнены кіраўнік дзяржавы.
У пацверджанне Прэзідэнт распавёў, што можна зладзіць просты эксперымент, каб асабіста ў гэтым пераканацца: «Калі ідзяце ў лазню, вазьміце імпартнае піва і айчыннае — як у нас было прынята пырснуць на камяні — і панюхайце, чым гэта ўсё пахне. Беларускае піва — гэта водар хлеба. Гэта ўсё жывое і натуральнае».
Прэзідэнт таксама выказаў меркаванне, што ў пытанні якасці няма прамой ўзаемасувязі з мадэрнізацыяй і выкарыстаннем высокатэхналагічнага абсталявання. «Часам на звычайных самагонных апаратах робяць такое пітво, што побач не стаялі ніякая гарэлка ці піва. Гэта не мая выснова. Я таксама не вялікі спецыяліст у самагонцы, віскі, каньяках і іншым. Але так кажуць людзі. Яны наадварот трымаюцца за гэты стары кацялок», — адзначыў беларускі лідэр.
Прэзідэнт у сувязі з гэтым рапавёў, што нядаўна глядзеў тэлеперадачу пра падарожжа аднаго з журналістаў па Нямеччыне, дзе ў тым ліку распавядалася аб вытворчасці нямецкага шнапса па традыцыйнай тэхналогіі. «Паказваюць гэты апарат — ён такі старажытны. А журналісты п’юць і аблізваюцца — шнапс самы лепшы. Дык чаму гэты чалавек, які вырабляе шнапс, не мяняе абсталяванне на суперсучаснае?» — сказаў Прэзідэнт Беларусі.
«Я не кажу, што мадэрнізацыя не патрэбна, але не трэба, пабываўшы на Захадзе, убачыўшы нешта бліскучае, туды бегчы. Але мы пабеглі», — заўважыў кіраўнік дзяржавы.