На сайце Мінгарвыканкама з’явілася падрабязная інфармацыя пра кандыдатаў у дэпутаты, уключна з іх даходамі за мінулы год.
Хто летась зарабляў у сталіцы лепш за ўсіх? Адзначым, што ў агульны даход маглі быць уключаныя грошы, атрыманыя ад продажу кватэры ці аўтамабіля. Аднак для зручнасці мы раздзялілі гадавы даход на 12 — атрымаўся сярэднемесячны даход.
1. Максім Крупейчанка. 443 мільёны рублёў на месяц = $27900
Касмічныя лічбы зафіксаваныя ў дэкларацыі беспартыйнага дырэктара ТАА «Металаптзбыт». Кампанія займаецца рэзкай і пракатам металічнай арматуры.
2. Уладзімір Сінігаеў. 99 мільёнаў рублёў на месяц = $6300
Падобныя абароты і ў прадпрымальніка, які вылучаецца ад ЛДПБ. Паказальна, што пра яго «Марлюшу» не ведае нават «Гугл».
3. Валерый Варанецкі. 88 мільёнаў рублёў на месяц = $7400
Сярод «бюджэтнікаў» лідзіруе амбасадар у Аўстрыі і Харватыі. Ён атрымаў найлепшы даход у замежнай валюце — агулам больш за 56 тысяч еўра пасольскага заробку.
У парламенце Варанецкі будзе мець нашмат меншыя грошы.
4. Сяргей Чэрачэнь. 69 мільёнаў рублёў на месяц = $4300
Гэта самы паспяховы прыклад таго, як прадстаўнік камуністаў робіць капіталістычныя поспехі. Партыец — дырэктар ТАА «Мантаж тэхніка», але мае долю яшчэ ў некалькіх бізнэсах.
5. Ігар Міхно. 61 мільён рублёў = $3900
Яшчэ адзін прадпрымальнік ад ЛДПБ, ён працуе намеснікам дырэктара Будаўніча-мантажнага ўпраўлення №215.
6. Дзмітрый Шаўцоў. 49 мільёнаў рублёў = $3100
Нарэшце ў спісе з’яўляецца першы дзейны дэпутат. Відавочна, у былога галоўнага доктара паліклінікі быў іншы даход, апроч дэпутацкага заробку. Бо ніхто з калегаў Шаўцова такіх грошай не меў.
7. Дзмітрый Бурак. 41 мільёнаў рублёў = $2600
Чарговы прадпрымальнік ад ЛДПБ, ён дырэктар кампаніі «Вентспецмантаж».
8. Ігар Камароўскі. 41 мільёнаў рублёў = $2600
Дырэктар Мінскага вагонарамонтнага завода, найхутчэй, будзе адным з прадстаўнікоў кішэннай Рэспубліканскай партыі працы і справядлівасці ў парламенце.
Камароўскі ўжо дэпутат Мінскага гарадскога савета дэпутатаў, а цяпер пойдзе на павышэнне.
9. Васіль Астроўскі. 40 мільёнаў рублёў = $2500
Самы багаты прадстаўнік Партыі БНФ мае транспартна-турыстычную кампанію «ОстКам-Адыгітрыя». Астроўскі узначальвае мінскую Раду па развіцці прадпрымальніцтва.
10. Вадзім Лакіза. 39 мільёнаў рублёў = $2400
Яшчэ адзін бюджэтнік, які мае патрапіць у парламент, — намеснік дырэктара Інстытута гісторыі Акадэміі навук. Археолаг увойдзе ў «беларускамоўную фракцыю» палаты прадстаўнікоў.
На адваротным баку рэйтынгу — чацвёра кандыдатаў, якія летась не мелі ніякага даходу.
Гэта два прадстаўнікі АГП (Дзяніс Ціханенка і Вольга Маёрава), камуніст Дзмітрый Рэут і беспартыйны дырэктар Цэнтра даследавання і прагназавання эканомікі Алег Іваноў.