17 красавіка Суд Цэнтральнага раёну Гомелю прызнаў вінаватымі актывістаў кааліцыі «Наша Альтэрнатыва» Андруся Цянюту, Наталлю Крывашэй і Станіслава Булу ў парушэнні парадку пікетавання.
За два дні да суду актывістам былі высланы новыя пратаколы, якія да актывістаў так і не дайшлі. Папяровыя позвы высланы не былі. Новы спосаб папярэджвання аб судзе — гэта эсэмэскі. Забыўся на тэлефон і паехаў у госці ці даў сваю сімкарту ў карыстанне знаёмым — нікога не цікавіць, галоўнае, што эсэмэска дайшла.
Напачатку суда Цянюта і Крывашэй падалі хадайніцтва аб спыненні адміністрацыйнай справы, бо адбылася падмена пратаколаў і былі парушэнні ў іншых дакументах. Ніякага пікету, як напісана ў адміністрацыйных пратаколах, яны ня ладзілі.
Але суддзя Казачок адказаў, што справа і без гэтага вярталася ў міліцыю на дапрацоўку, копіі першапачатковых пратаколаў не маюць ніякай юрыдычнай сілы, бо іх няма ў справе.
Наталля Крывашэй так каментуе дадзеную справу:
Беларусы заўсёды былі вельмі эмацыйнымі і жаласьлівымі людзьмі. Мы заўсёды смуткуем, калі здарюцца нейкія падзеі і гінуць людзі. Бо чалавечае жыцьцё — самае галоўнае, што ёсьць на сьвеце. І калі людзі паміраюць, якая розьніца, як — пры тэракце, калі зьбівае аўтамабіль чалавека альбо так, як адбылося ва Ўкраіне, калі людзі прыйшлі адстойваць свае правы, а іх проста ўзялі й расстралялі. І не смуткаваць у гэтым выпадку нельга. Мы прыйшлі проста паказаць, што мы неабыякавыя. Нам таксама сумна, і мы плачам разам з Украінай
22 лютага 2014 года сябры кааліцыі «Наша Альтэрнатыва» смуткавалі па забітых на Майдане ў Кіеве. Ля памятнага знака «Нулявы кіламетр» былі вывешаны спісы загінулых на Майдане. Запаліць знічкі актывістам не далі… За арганізацыю несанкцыянаванага масавага мерапрыемства Андрусь Цянюта, Наталля Крывашэй і Станіслаў Була былі дастаўлены ў Цэнтральны РАУС і на іх былі складзеныя пратаколы.
Таксама быў затрыманы Кастусь Жукоўcкі, які падыйшоў пасля сустрэчы актывістаў з міліцыянтамі. За тое, што ён пачаў фатаграфаваць маладзёнаў, і яго таксама даставілі ў міліцыю. Cупрацоўнік Цэнтральнага райаддзелу міліцыі Бельскі ў дачыненьні да Жукоўскага падпісаў пастанову на перасьлед па крымінальным артыкуле 364 — пагроза прымяненьня гвалту да супрацоўніка міліцыі. І «пагроза» гэтая палягала ў тым, што Жукоўскі сказаў міліцыянтам: трэба папярэдзіць грамадзкасьць Украіны, каб адпаведныя органы забаранілі ўезд на сваю тэрыторыю ўсім гомельскім міліцыянтам, якія перашкодзілі ўшанаваць памяць ахвяраў Эўрамайдану.
Natkaz.by
