«Ну і няхай, адсядзім 15 сутак, адпрацуем і ўсё» – гэтак рэагуюць жыхары Краснапольскага раёну на Магілёўшчыне на перспектыву атрымаць содні за тое, што не сплацяць гэтак званага падатку на дармаедства.
https://youtu.be/FZLH5oQ-p-E
Газу няма, святла няма, ёсць толькі бульба, яблыкі ды сыраежкі
Беспрацоўныя вяскоўцы атрымалі папярэджанні пра неабходнасць з’явіцца ў падатковую, каб патлумачыць, чаму яны не плацілі падаткаў у 2015-ым.
«За што я павінен плаціць Br 360, я не ведаю. Калгасы разваленыя, працы няма. На біржы таксама сказалі што працы няма. На біржы дапамогу не даюць за тое што беспрацоўны», – кажа жыхар вёскі Раманькі.
Мікалай жыве адзін, даўно не працуе, бо працы не можа знайсці не толькі ў сваёй вёсцы, але і ўва ўсім раёне.
«За святло не было чым плаціць – адключылі, газу няма на што купіць. На вуліцы печка стаіць, там бульбу гатую. Цяпер добра яшчэ яблыкі ёсць. Часам можна сыраежку знайсці», – дзеліцца яшчэ адзін беспрацоўны з Раманькі Мікалай Канаплянікаў.
Краснапольскі раён лічыўся пацярпелым ад Чарнобылю, цяпер ільготы знялі. Сельскую гаспадарку знішчылі аб’яднаннем калгасаў – увесь раён гэта адно адкрытае акцыянернае таварыства «Краснапольскі». Якое не можа забяспечыць працай нават тых нешматлікіх вяскоўцаў, што не ўцяклі ў горад.
«Хоць пехатою буду ісці, дайце хоць нейкую працу – кажуць няма, чакайце», – зазначае Мікалай.
Плаціць пакуль не трэба, але ніхто і не збіраецца
Працы няма, а вось падатак – заплаці. Што праўда, у падатковай інспекцыі супакойваюць: паперкі без подпісу і пячаткі, якія атрымалі беспрацоўныя вяскоўцы – гэта яшчэ не абавязак плаціць.
«Гэта проста паведамленне што ў вас ёсць шанец прыйсці ў інспекцыю і патлумачыць што вы магчыма працавалі па дамове ці можа афіцыйна працавалі ў Расеі, ці хварэлі ці ў вас інваліднасць», – супакойваюць у падатковай інспекцыі.
Тыя, хто ўжо атрымаў такія паведамленні, плаціць пераважна і не збіраюцца. Бо папросту не маюць грошай.
«Няма ў мяне чым плаціць, у мяне дзеці ёсць, мне трэба дзяцей карміць а не дзяржаве плаціць Br 360»,
«Няхай садзяць. Няма грошай плаціць – няхай садзяць. У турме не страшна!»,
– прызнаюцца мужчыны.
Праваабаронцы ж нагадваюць, што дэкрэт пра дармаедства супярэчыць Канстытуцыі ды прапаноўваюць не звяртаць увагі на паперкі без пячаткі.
«Трэба адстойваць свае правы і патрабаваць каб выконвалася канстытуцыя, і казаць пра тое, што я маю права не працаваць. І гэта не мой абавязак. Паведамленні якія не ўтрымліваюць ні даты ні подпісу, можна прыраўніваць да спаму і выкідаць у смецце », – тлумачыць праваабаронца Леанід Судаленка.
Спачатку ты дармаед, потым апазіцыянер, а пасля – касінер
Толькі праблема ад гэтага не знікне, праца ды грошы не з’явяцца, а патрабаванне заплаціць падатак, ужо з пячаткай і подпісам, усё ж прыйдзе да беспрацоўных.
«Ня ведаю што рабіць. Напэўна трэба браць косы ў рукі і на нейкую дэманстрацыю. Нічога больш не застаецца», – падсумоўвае Мікалай Канаплянікаў.
Br Br 360 беларусы, якія не працавалі больш за 183 дні летась, мусяць заплаціць да 15-га лістапада.
