Гомельская філія Таварыства беларускай мовы імя Францыска Скарыны праводзіць акцыю “Дзякуй за мову”. Актывісты выказваюць падзяку прадстаўнікам бізнесу, якія прыязна ставяцца да роднай мовы. Старшыня гарадскога аддзялення ТБМ Алеся Аўласевіч заўважае, што вельмі важна падтрымліваць першыя крокі бізнесу па ўвядзенні роднай мовы ў штодзённы ўжытак.
Алеся Аўласевіч: Апошнім часам з’яўляецца ўсё больш бізнесоўцаў, якія прасоўваюць сваю прадукцыю па-беларуску. ТБМ гэта бачыць і цэніць. І нам хочацца такія арганізацыі ўсяляк падтрымліваць і выказваць падзяку. Мы плануем кампанію развіваць, каб кожны беларускамоўны прадукт быў заўважаны і атрымаў падзяку. Я думаю, гэта можа натхніць іншых.
Дырэктар гомельскай кампаніі „Тэрмадэкор” Вадзім Мартыненка пачаў рабіць першыя крокі па беларусізацыі свайго бізнесу. Частку рэкламы, шыльды і абвесткі яго супрацоўнікі робяць на роднай мове.
Вадзім Мартыненка: Зараз мы праводзім рэканструкцыю памяшканняў, таму аўтаматычна мяняем многія шыльды і абвесткі на беларускамоўныя. Гэта патрабуе нейкага часу. Каб уключыць асноўную беларускамоўную версію на сайтах, патрэбна дзесьці два месяцы. А яшчэ мы плануем памяняць білборды, банеры, фірмовыя бланкі, візітоўкі, рэкламу на машынах. Для ўсяго гэтага патрэбны бюджэт, таму змены будуць адбывацца паступова.
Вадзім Мартыненка падкрэслівае, што беларусізацыя ў ягонай кампаніі будзе праходзіць вельмі павольна і без усялякага прымусу, каб не выклікаць адваротны эфект.
Прадстаўнікі гомельскага дробнага бізнесу таксама не цураюцца беларускай мовы ў рэкламе. Індывідуальны прадпрымальнік Аляксандр Мякшынаў займаецца ўсталёўкай вокнаў і ўваходных дзвярэй. Ён кажа, што менавіта беларуская мова ў рэкламе дапамагае яму часцяком абыходзіць канкурэнтаў. Беларускамоўныя рэкламныя ўлёткі і буклеты прыцягваюць увагу кліентаў.
У будучым я планую развіваць бізнес пад брэндам „Зорыца”. Беларуская мова для мяне – гэта і ўдалы маркетынг, і патрыятызм. Мой род па лініі маці мае прозвішча Гулевіч. Мае продкі жывуць на Гомельшчыне больш за 300 год. Бацька паходзіць з Магілёўшчыны. Вялікае княства Літоўскае, Рэч Паспалітая, Беларусь – гэта радзіма маіх продкаў, таму беларуская мова для мяне родная.
Гомельцы, якія хочуць далучыцца да кампаніі “Дзякуй за мову”, могуць фатаграфаваць беларускамоўныя шыльды і размяшчаць іх у сацыяльных сетках з хэштэгам #дзякуйзамову.
