У Віцебску з’явяцца вуліцы, названыя ў гонар двух славутых землякоў-паэтаў. Адна з іх увекавечыць імя народнага паэта Беларусі Рыгора Барадуліна, другая — Канстанціна Вераніцына, аўтара паэмы «Тарас на Парнасе».
Адпаведнае рашэнне 25 сакавіка 2015 года прыняў Віцебскі гарадскі савет дэпутатаў, паведамляе «Еўрарадые» .
Нагадаем, што Канстанцін Вераніцын жыў у ХІХ стагоддзі і стаў адным з заснавальнікаў сучаснай беларускай літаратуры. Рыгор Барадулін (1935-2014) — апошні з літаратараў узнагароджаны званнем Народнага паэта Беларусі. У 2006 годзе за кнігу вершаў «Ксты» быў вылучаны на Нобелеўскую прэмію па літаратуры.